YOSI

Warning:: This does not mean promoting cigarette  smoking!

Yosi

Adrianne D’Cruz Balagot

Sabi nila…

‘La ka raw kwenta

Dagdag pambutas ng bulsa

Butas ang baga ‘pag di nasawata

Kulang pa...

Kung malait

Humihithit... Bumubuga

Waring may banal

Nahulog sa lupa

Kung humusga

Talbog ang papa sa Roma

Salamat na rin sa paalaala

Panambitang pang-aalimura.

Pero...!

Sabi lang nila yon di ba?

Pagkat di nila alam,

ang iyong halaga

Sa tulad kong ikaw ang laging kasama

Oo...!

Para sa kanila, silbi ay wala ka!

Pero... pa’no ko pag wala ka?

E! Sa ‘yo lang ako may pagkakataong

Mag-isip…

Magsumbong… ihinga ang sama ng loob

Mangarap at magpasya.

Bakit kasi kadiri kung turan ka?

Naranasan ba nila na ika’y makasama?

Ahhhhhhhhh!

Bakit?...

                                Bakit?...

                                                                     Bakit?...

Bakit nauso pa?

Umaastang banal sa balat ng lupa?

Gayong mas malinis pa sa kanila

Usok na ibinubuga

Sana... makasama ka nila...

Kahit minsan lang!

Bago man lang mamaalam

Tuluyang lumisan.

Tulad ko…

Aalis ka rin

Parehong pag-iral pansamantala

Di pa nakita… mumunting halaga

Nilait-lait pa

‘pag upos na

Ihahagis sa kalsada

Tapak-tapakan

ng mga makwekwenta

Lingid sa kanila

‘pag tayong dalawa’y nagsama

Marami tayong nababasa sa kanilang mukha

Kaya nabubuo ang bawat istorya.

Gaya ngayon…

Nagtatalik ang usok at kaluluwa

Nabubuo…

Iba-ibang larawan

May mukha…

May piso…

May mukha sa piso

May mukhang piso

Marami…

May isa… dalawa… tatlo…

Tatsulok sa mundo.

Marami talaga

Iba-iba…

Ibang iba…

Pagsasama nating dalawa

Naiintindihan natin ang isa’t isa

Kung wala ka…

Kulang ako

Ikaw lang ang kausap

Sa panahon ng pag-iisa.

Haaaaaahhhhh!

Hayan natin sila

Nandito pa tayo.

Di maghihiwalay

Lilikha ng panibagong kabanata

Susulat nang naiibang kwento

Tayo naman ang bida

‘Di lang sila… 

Sobra na…

Binubuhay sila sa mga istorya

Habang pinapaslang tayo ng mga paghaka.

Di na maghihiwalay

Ni malimutan sa kanilang diwa

Pagkat tayo na ang bida

Habang buhay ang mga letra

Paulit-ulit tayong maaalaala.

Upos… mamamatay ang baga

Kasabay… pagpikit ng aking mga mata

May pangrap na nabuo

…nagtugumpay sa’ting pagkawala!